ہم آپ کا استقبال کرتے ہیں

جامعہ ستاریہ فیض الرّحیم برصغیر کے قدیم، معتبر اور ممتاز دینی، علمی، تربیتی اور روحانی اداروں میں شمار ہوتا ہے، جس نے تقریباً ایک صدی سے قرآن و سنت کی تعلیم، اصلاحِ باطن، دعوتِ دین اور امت کی دینی و اخلاقی رہنمائی کو اپنا نصب العین بنا رکھا ہے۔ اس عظیم ادارے کی بنیاد 15 شوال 1352ھ مطابق 12 فروری 1933ء کو رکھی گئی اور اس قیام کی سعادت حضرت شاہ حافظ عبدالستار نانکوی رحمۃ اللہ علیہ کی انتھک جدوجہد، اخلاص اور دینی بصیرت سے حاصل ہوئی۔ حضرت شاہ حافظ عبدالستار نانکوی ایک خدا ترس بزرگ، صوفی، زاہد، عالم، قطب وقت اور اپنے دور کی مسلمہ شخصیت تھے، وہ حضرت مولانا عبدالقادر رائے پوری کے خلیفہ تھے اور ان کے پاس ہمیشہ لوگوں کا تانتا بنا رہتا تھا، وہ مستجاب الدعوات تھے، ان کی تمام دعائیں قبول ہوتی تھیں اور ان کے کشف و کرامات بھی بہت مشہور تھے، ان کی دعاؤں کی برکت سے اللہ تعالیٰ نے بے شمار لوگوں کو ہدایت عطا کی اور ان کے مریدین و معتقدین اس علاقے میں بڑی تعداد میں موجود ہیں۔ جامعہ ستاریہ کی امتیازی شان صرف دینی علوم کی تدریس تک محدود نہیں بلکہ اس کی اصل شناخت تعلیم، تربیت اور تزکیۂ نفس کا حسین امتزاج ہے، یہاں طلبہ کو قرآن، حدیث، فقہ، تفسیر اور دیگر اسلامی علوم اس انداز سے پڑھائے جاتے ہیں کہ ان میں علم کے ساتھ عمل، اخلاص، تقویٰ اور حسنِ اخلاق کا جذبہ بھی پروان چڑھے، نیز اسلامی تعلیم کے ساتھ عصری تعلیم بھی اپنے معیار کے ساتھ فراہم کی جاتی ہے۔ اپنی تقریباً ایک صدی پر محیط تاریخ میں جامعہ نے ہزاروں حفاظ، علماء، مفتیان اور داعیانِ دین تیار کیے ہیں جو ہندوستان سمیت مختلف ممالک میں دین کی خدمت انجام دے رہے ہیں، الحمد للہ آج بھی یہ ادارہ اپنے بانی کے مشن کو اسی اخلاص اور استقامت کے ساتھ آگے بڑھا رہا ہے اور اس وقت جامعہ کی انتظامی ذمہ داری حضرت شاہ حافظ عبدالستار کے پوتے حضرت مولانا عتیق الرحمن نانکوی خلیفہ و جانشین حضرت حافظ جمیل نانکوی کے سپرد ہے، حضرت شاہ حافظ عبدالستار نانکوی کی ذات اس ادارے کی روح ہے اور ان کی برکات کا سایہ آج بھی اس مرکز پر موجود ہے، جس کی بدولت یہ ادارہ ہر دور میں کامیابی کے ساتھ اپنے مشن کو انجام دیتا رہا ہے۔